Indra visita o CiTIUS

O centro recibiu onte a unha delegación da multinacional española, referente do sector das Tecnoloxías da Información no país.

As instalacións do CiTIUS volveron converterse en escenario de presentación de tecnoloxía perante o sector empresarial, no marco da decidida aposta do centro por fortalecer os lazos coa industria.

Unha delegación da compañía tecnolóxica Indra desprazouse onte ata Santiago para coñecer de primeira man algúns dos resultados de investigación obtidos ao longo dos últimos meses, participando durante toda a xornada nunha visita organizada polo centro coa que se pretendía ofrecer unha perspectiva global das súas potencialidades científicas.

Ata seis representantes da multinacional española tiveron ocasión de coñecer in situ algunhas das liñas de traballo activas na actualidade, asistindo a distintas presentacións nas que os investigadores puxeron en coñecemento dos visitantes os detalles técnicos de cada demostrador, atendendo ás súas consultas en detalle e resolvendo as dúbidas dos representantes de Indra e o seu modelo de innovación Indraventures, o novo instrumento de Indra para estreitar a relación coas universidades que están a experimentar con tecnoloxías emerxentes.

Negocio aberto, áxil e flexible'

Indraventures é o vehículo de Indra para estreitar a relación co ecosistema emprendedor e financiar iniciativas, canalizando acordos de colaboración e accións de incubación ou aceleración co obxectivo de identificar, xerar e incorporar diferentes solucións innovadoras, disruptivas e con alto potencial de negocio á oferta de Indra.